في ليلة استثنائية امتزج فيها سحر الصوت بعبق الطموح، أحيت أيقونة الغناء العربي الفنانة أصالة نصري حفلاً غنائياً مبهراً على مسرح موسم الرياض، وسط حضور جماهيري حاشد وتجهيزات عالمية. أصالة التي وصفت الليلة بأنها “حلم” و”بوسة على قلبها”، لم تكتفِ بتقديم الطرب، بل شاركت جمهورها مشاعر القلق والشغف التي تسبق اعتلاء المسرح، مؤكدة أنها لا تزال ترى نفسها تلك الطالبة المجتهدة في محراب الفن، لتقدم ليلة تاريخية بمشاركة النجمة التركية “إيبرو كوندش”، وتعلن من قلب الرياض عن بداية مرحلة فنية جديدة.
أحيت الفنانة أصالة حفلاً غنائياً مساء أمس على مسرح موسم الرياض بمشاركة جماهيرية واسعة وقالت : كانت ليلة مبارح بالنسبه إلي متل حلم وكل شي كان متعاضد مع هالليله ليكون تأثيرها بنفسي بلسم لروحي وبوسه على قلبي وبصمه في مشواري من الفخر والتباهي ووسام على صدر أحلامي وطموحي وشغفي .. ياالله شو كنت خايفه ليالي قبلها ماأعرف نام أكتر من ساعتين تلاته وأصحى على مليون فكره بدي قدمها وألف قصه بدي أحكيها ولأني على قناعه بإني لسه المشوار بأوله بقدم فني وكأني الطالبه المجتهده العاشقه لما تفعل وماتعمل ..
روح الفريق وشغف الإبداع على المسرح
وكل إنسان كان عم يشتغل بالحفله مبارح كان متلي عاشق ومُحبّ وماكنت لوحدي خايفه عليي الكل كان عليي خايف وبيشجع وبيساعد وبيعمل أكتر من الواجب لأنه الحب بيخلينا نعطي أكتر من طاقتنا وهيك كلنا كنا مبارح .. الصولوهات مو معقوله كانت شو ساحره المسرح مبهر المايسترو شاطر والمخرج مبدع ومدير التصوير صديقي قدم أحلى ماعنده ولبسي كان بيجنن لأنه مشغول بحب وماكياجي متل لوحه انرسم وشعري ( رغم إنه مو شعري) بس كان مقنع وحلو وصوتي اللي دلعته طول النهار بأحلى الإختراعات لتجهيز الصوت وإستعداده لتقديم الأفضل أنصفني ورد لي الإهتمام بإمتنان..
امتنان للجمهور وهيئة الترفيه
الحمد لله على نعمة محبتكم اللي بتنقذني دائماً من جميع أهوال الحياة وبتطلعني لمطرح بيشبه الحلم .. شكراً لهيئة الترفيه على تكريس كافة الإمكانيات لإنجاز حفل بهالحلاوه وهالجمال وكل الإمتنان لسعادة المستشار تركي آل الشيخ ( أبو ناصر ) على ثقته وأفكاره اللي كانت مبارح هوه مقترحها وكان شايف اللي صار فعلاً رغم كلنا كنا خايفين ومو عارفين كيف رح تكون النتيجه وكانت متل ماتوقعها ( هيك بعتقد) .. شكراً روتانا على كم الإهتمام والرعايه اللي غمروني فيها ومتل طفله مدلّله عاملوني ..
تعاون عالمي مع إيبرو كوندش
شكراً للصديقه الموهوبه الرّائعه المطربه العالميه إيبرو كوندش على مشاركتها اللي جداً فرقت بالحفل وكان إلها وقع غير عادي لأنه هالعمل أُنجز بمحبه وصداقه وصدق وكل المشاعر الأخويه الراقيه والمرتقيه ..
السعودية.. الحاضنة والداعم الأكبر
شكراً لوطني الحبيب الحنون الداعم السعوديه على اللي قدمتوا لي ياه من سنين لحد ليلة مبارح بحبكم حب جبار وقلبي متعلق فيكم وأرجو من ربي كون دائماً عند حسن ظنكم وبوعدكم بالإلتزام وإحترام ثقتكم وبادلكم المحبه بالمحبه والإحترام بالإحترام وأن تكون حفلة مبارح هيي بداية إنطلاقه جديده وأرجع ألتقيكم بالعيد بشكل كمان جديد وأسعى لأرتقي لخيالكم بفني وبروحي وكمان قلبي ياأهلي وأحبتي وناسي الغاليين.